2024 жылдың 1-3 қазан аралығында Алматы қаласында «Almaty First Championship» атты республикалық робототехника олимпиадасы оздырылды. Олимпиаданың FLL Challenge бағытындағы Robot Game, Innovation Project, Robot Design, Core Values категориялары бойынша еліміздің үздік командалары өзара бақ сынасты. Бұл олимпиадада МИ-23 тобының 2-курс магистранты Қырықбаев Нұрболдың жетекшілігімен И-31 тобының 3-курс студенті Акбулатов Дулат пен ИР-31 тобының 3-курс студенттері Мендешқызы Нұрбақыт және Иманғазиева Назеркеден құралған команда роботқа берілген арнайы 15 тапсырманы орындап, төрешілер алдында ғылыми жобаларын қорғады. Нәтижесінде М.Өтемісов атындағы Батыс Қазақстан университетінің физика-математика факультетінің «Toro D’oro» командасы «Robot Design» арнайы аталымын жеңіп алды. Алдағы уақытта «Toro D’oro» командасына сәттілік тілей отырып, алар асуларыңыз көп болсын демекпіз!
