05.12.2023ж күні М.Өтемісов атындағы Батыс Қазақстан университетінің физика-математика факультеті Орал қаласының болашақ талапкерлеріне өз есігін айқара ашты. Ашық есік күні – мектеп оқушылары өз армандарына бір қадам жақындап, «оқуға түссем» деген мақсаттарын жүзеге асыру жолдарымен танысты. Қаламыздың №5, 22, 46, 47 жалпы орта білім беретін мектептері мен №35 мектеп-лицейінен келген оқушылар университетке түсу үшін қажетті әрі маңызды ақпараттармен танысты. Ашық есік күнінің шымылдығы информатика және робототехника білім беру бағдарламасының 2-курс студенті Силыбаев Назардың орындауындағы «Әлқисса» күйімен ашылды. Алғашқы сөз кезегін алған физика-математика факультеті деканының оқу ісі жөніндегі орынбасары Айжан Урынгалиевна оқушыларды университетіміздің оқу-материалдық базасымен таныстырып, оқуға түсу тәртібі, оқу жүйесі мен университетте білім алудың тиімділігі жайлы толық ақпарат берді. Факультет оқытушылары мен студенттері оқушыларды жылы жүзбен қарсы алып, оларды университет және факультет тынысы мен университеттегі мүмкіндіктер, шәкіртақылар, академиялық ұтқырлық пен білім беру бағдарламалары туралы ақпараттармен қамтамасыз етті. Математика білім беру бағдарламасының аға оқытушысы Мұхамбет Мендыгалиевич педагогикалық мамандықтың қыр-сырын айта отырып, қазіргі уақытта сұранысқа ие екенін және мұғалімнің қоғамдағы орнын ерекше атап көрсетті. Педагогика ғылымдарының кандидаты, доцент Айгүл Бактыгалиевна оқушыларға зейін мен зердені шыңдайтын психологиялық тренинг өткізді. Тренингте оқушылар белсенділік танытты. Сонымен қатар оқушыларға мазмұнды презентациялар мен бейнебаян демонстрацияланды.
Факультетіміздің президент атындағы шәкіртақы иегері Шекербекова Ұлболсын мен белсенді студенттер Силыбаев Назар, Нұрболат Нұрбол, Жұмағұлов Бекзат, Муфтиева Дана оқушыларға өздерінің жетістіктерімен, факультеттегі қоғамдық өмірдің тыныс-тіршіліктерімен, мақсаттарымен, өзіндік ұстанымдарымен бөлісіп, келген қонақтарға әуезді ән шырқап керемет көтеріңкі көңіл-күй сыйлады. Одан әрі шара Нұрбол Мұсаұлының «Робототехникаға саяхат» атты шеберлік сыныбына ұласты. Ашық есік күніне келген барлық талапкерлерге факультет ұжымы алдағы уақытта жолдарының ашық болып, бақтарының жанып, армандарының шындыққа айналып, өз қалаған мамандықтарының иесі болуларына тілектерін қарша жаудырды. Әр мектептен келген кәсіби бағдар беру жұмысына жауапты мұғалімдер факультет ұжымына алғыстарын білдіріп жақсы көңіл-күймен тарқасты.
Информатика мұғалімдері мен IT мамандарын дайындау білім беру
бағдарламасының оқытушысы: З.М.Химеденова
